台灣woohoo之旅---墾丁,高雄day4 海生館, 85大樓, 六合, 瑞豐

由於好人叔叔唔得閒,,叫咗佢朋友黎接我地去海生館
我地開頭冇問佢幾錢,,不過之前去恆春問過個的士司機要NT$600,,依家喱個收我地NT$250咋
未到九點佢就黎到,,我地喺隔離7-11買咗個bagel同蘋果多做早餐,,bagel好食!推介!
買咗蔓越莓味,,以為冇餡,,原來入面係蔓越莓cream cheese!

行李擺咗喺民宿,,同佢地講咗話陣間有司機黎攞再去海生館接我地去高雄
民宿嗰邊都好認真用紙仔mark低貼喺行李以免調亂,,值得一讚
司機喺途中幫我地去hot墾丁買門票,,有學生證NT$230,,平過喺海生館買廿蚊台幣
九點半就去到喇,,地方好大,,即刻換張門票就入去喇

入到去見到個好ge大水池,,可以入去玩水ga,,見到好多大人小朋友都齊齊玩水降下溫
水池有幾條巨鯨魚模型,,好有氣勢!
可惜著住波鞋費事整濕,,唔係實入去涼下

一入去個館度就見到好多魚模型喺天花吊落黎,,好得意呀!
總共有三個館,,第一個去珊瑚王國館,,唔只得珊瑚睇ga,,仲有好多魚仔同鯊魚
仲見到有工作人只喺缸入面清潔,,有趣!
喱度設計得好好,,沿住海底隧道睇參觀,,好似身置海底一樣d魚喺你頭頂游過

仲有沉船區,,模仿海底沉船的環境,,邊類魚會藏喺船ge唔同位置
最右面張相就係海底隧道,,可想言之嗰度有幾大,,幾壯觀!

沉船區仲有相當逼真ge佈置!!製作認真!!睇到心入面不停驚嘆
嗰度仲有幾隻白鯨,,佢地好鬼巨!仲會玩自轉,,得意!
右上好似係真ge白鯨骨造成標本

第二個館係台灣水域館,,生態同景觀完全模擬實地景象
一開始會有溪,,河,,水庫,,仲見到蟹仔同彈塗魚
中間張相係盒仔魚,,佢個樣好搞鬼,,咀嘟嘟咁
佢地有個觸摸區,,有得摸海膽,,海星同海參
仲有個好大好大好大ge展示區,,展示鯨鯊,,壯觀!

第三個館係世界水域館,,要行出户外到另一邊,,千祈唔好行漏呀
行去世界水域館又見到個好靚ge大海,,靚景!
其中一個主題古代海洋入口都幾駭人下,,見到有小朋友被嚇到喊,,膽小如鼠ge我當然都差d驚到唔想入

好多樣貌古怪ge生物,,有d個樣都幾唔討好下
其中一個賣點超巨型海草!睇下同d人一比,,人類幾渺小

仲有極地水域睇企鵝,,好多企鵝呀!
個展區凍到好似身置極地咁,,好鬼凍
不過佢地真係好得意!!!!!!!!!仲會游埋玻璃度睇下你做咩望住佢

明明叫咗12.30接我地走,,點知佢未夠十二點就打俾我話到咗
我miss咗六七個call先見到打返俾佢都仲好nice
不過我地要去個廁所又要買嘢食,,結果12.30先出到去,,真係唔好意思
佢仲開車尾箱俾我地睇下有冇拎錯行李添!
上車見到有個男人,,都嚇一嚇,,原來佢係阿兵哥,,係司機好心載佢出高雄軍校

喺海生館買咗炸雞膇,,炸雞粒同養樂多冰沙
炸雞好貴份量又少,,不過養樂多冰沙係推介!感覺完全冇溝水,,味道濃!

搭咗個幾鐘就到高雄85大樓,,NT$350一個人,,應該係公價
第四日仍然係民宿(日租),,叫85大樓新宿,,喺12樓登記就有人帶你上房
走廊都陰沉,,出入要用門卡
入度去都覺得好唔錯,,乾淨企理,,不過廁所真係唔係好得
好暗,,兩個小燈有一個壞咗,,下次都係搵過第二間
不過個景都幾唔錯,,雖然唔係海景,,但好開揚

由於早咗到又諗唔到去邊度玩,,喺房hea咗個幾鐘先出去食嘢
往大遠百食蝦捲途中又台一台茶,,仍然係我最愛ge奶綠
周氏蝦捲好食!仲點咗個炸蚵仔,,唔食蚵仔ge我都覺得好食!
成個重點就係炸嘢好食!香口嘢萬歲!多麼不健康ge人xd

之後就搭高捷去六合夜市,,美麗島車站必影天花!
第一站就食朋友仔恨咗好耐ge巨無霸花枝鬚,,話咗唔係原支俾佢仍然唔死心
唯有買黎食,,NT$50一份,,喺後面剪到一粒粒ge花枝再返炸,,唔死心ge朋友可以一試

我指定要食(魚土)魠魚焿,,除咗魚字真係冇個識,,去到唯有話"我要一碗小的",,NT$45
佢係擺兩舊炸咗ge魚落個打咗獻ge湯度,,湯頭好清甜,,炸魚脆卜卜,,有魚味但唔腥
仲有指定要飲喱檔木瓜牛奶,,濃郁好味!

轉戰下一場瑞豐夜市,,喺巨蛋站落車,,出咗去跟住人流行就啱ga喇,,聽聞當地人最愛ge夜市
不過要注意喱度唔係日日開,,星期一同三都唔開ga,,小心摸門釘
喱度人真係超多,,好逼,,通道又窄,,身邊就係油鍋都咪話唔驚
除咗食之外,,仲有遊戲攤同衫,,又玩咗個丟圈遊戲,,朋友仔好勁丟中支可樂

第一站炸彈烏賊燒,,釀咗d燉飯喺魷魚入面,,再炸,,都唔錯,,新奇有趣
第二站印度拉茶,,貪佢用袋裝有風味,,味道都可以,,冇好特別

第三站蒙古燒烤,,一人份NT$120,,揀咗要咩肉,,再俾個盤你夾菜,,任係夾,,裝到就ok
然後俾佢喺個大鐵板炒埋一碟,,夾咗少少辣椒都辣到飛起
味道都可以,,冇咩特別,,普通鐵板炒雜菜

第四站烤鴨夾餅,,NT$40
要咗綜合口味,,鴨加豬,,佢炒返熱d配料就捲係個包度,,比想像中好食!!意相不到地唔錯
第五站小蓄茄,,佢夾咗d梅喺入面,,又真係好食咗wor

第六站芒果冰沙,,NT$40
真材實料見住佢落咗差唔多成個芒果,,抵飲過香港d糖水沙冰多多聲