貓仔仔用品準備篇 (一)

新增貓仔系列嘅BLOG喇!!!以後唔止吃喝旅行，仲有貓仔睇!!第一篇係未出發先興奮之用品準備篇! 第一次養貓咩用品都冇，一知道幾時可以接貓仔仔回家後便不停睇好多貓資訊同用品。行咗幾次寵物店，有啱心水嘅唔多，同埋好貴，唯有上淘寶搵尋寶！淘寶真係好正，同一樣嘅貨品平香港一半，而且重點係真係正貨。當然有唔少仿製品，但只要睇清楚，睇多幾間同其他人的評語，買到平靚正嘅貨品都唔難。因為今次買嘅嘢無論質素同價錢都好唔錯，所以要分享一下。

第一樣係貓床仔。第一次喺香港Q-PET見到就好鍾意，可惜索價三百多，實在買唔落手。哩個床仔可以一物兩用，可以整到四方盒咁，俾貓仔喺入面瞓，又可以禁扁佢好似個兜咁。淘寶賣128人仔，同我喺香港見到嘅一樣，而且質地厚實。送黎嘅時候有個袋入住，有晒標籤同牌仔。

可惜貓仔只係頭兩日肯入去瞓，明明好保暖，都唔入去瞓。結果依家長期禁扁佢等佢得閒坐下。

第二樣係佢個寵物籃。睇過香港好多寵物袋都唔鍾意，本身想買飛機籠，但係料靚啲又貴。結果喺淘緊貓廁所嘅時候發現哩個提籃。本身覺得好似一個買餸籃好古怪，不過佢嘅料好靚，上面又可以見到貓仔喺籃入面嘅情況。

香港見到網上面賣二百幾蚊，淘寶就11X人仔。送黎嘅時候有埋原裝IRIS紙盒，品質亦相當滿意。入面有一塊防滑絨毛毯，等貓仔瞓得舒服啲。仲有一條帶可以斜揹住個籃。

第三樣就係貓廁所。因為怕貓便便味道好臭，所以一直想搵有蓋嘅，而且一直覺得IRIS嘅質素好好，但喺香港買哩隻型號好似要三百幾蚊。所以又喺淘寶買，承惠165人仔。

不過由於怕撞爛，賣家用一個比廁所大三份一嘅紙箱，再喺入面放滿賣充物，結果成箱嘢勁重，不過佢運內地係免運費，但我用集運運返落黎都有少少麻煩。

講返個廁所先，質地好硬淨，而且有個格仔腳踏，可以減少貓仔帶砂出去。佢仲送咗一塊吸味紙同保暖貼。可惜貓仔依家困緊籠未用得住。

仲有其他用品，下回再續！